অসমীয়া বোৰ সঁচাকৈ আচৰিত আৰু লগতে অত্যধিক আবেগিক! নহয়নে ? নহলেনো এই কেইবা লাখ অসমীয়াই বিশ্বত অভিলেখ হোৱাকৈ নোখোৱা-নোবোৱাকৈ চাৰি-পাঁচদিনকৈ এজন মৃত ব্যক্তিৰ পাছে পাছে কান্দি কান্দি দৌৰি থাকেনে, কিমান আবেগিক বাৰু?
অসমৰ মুখ্যমন্ত্ৰীজন, যি জনৰ নিৰ্বাচন সমাগত, খাবলৈ-শুবলৈও তৰণি নাই ৷ সেইজন মুখ্যমন্ত্ৰীয়ে জুবিন দাৰ মৃতদেহ চমজি লোৱাৰ পৰা অন্তিম সৎকাৰ শেষ কৰালৈকে স্বয়ং ছাঁটোৰ দৰে লাগি আছে! নহয়নে বৰ আচৰিত ?
সেই পুলিচ বিষয়া কেইগৰাকী, যাৰ খাকী ৰঙৰ পোচাক যোৰ, ৰঙা চকু আৰু লাঠী ডাল দেখিলে সাধাৰণ লোকৰ মুখৰ মাত হেৰাই, তেনে পুলিচ বিষয়াই সৰু ল’ৰাৰ দৰে ফেঁকুৰি ফেঁকুৰি কান্দি কান্দি কৰ্তব্য কৰিছে ৷ কাৰোবাৰ প্ৰতি কিমান মৰম আৰু আবেগ থাকিলে এনেদৰে কৰ্তব্য কৰিবলগীয়া হয় বাৰু ?
যি সকল লোকে এইকেইদিন ঘৰত আছে, তেখেত সকল ? মাথোঁ টিভিত নাইবা ম’বাইলতে জুবিনদাৰ শেষ শ্ৰদ্ধাঞ্জলিৰ দৃশ্যবোৰ চায় চায় চকুপানী টুকিছে, হুমুনিয়াহ কাঢ়িছে ৷ কোনেও একো কাম কৰিব পৰা নাই ৷ সময়ত খোৱা নাই, সময়ত শোৱা নাই ৷
কথাই কথাই জুবিনদাক সমালোচনা কৰা, গালি পৰা অসমীয়া কেইটা ক’ত হেৰালে আজি ? কিয় তেওঁলোকে জুবিনৰ নাম লৈ উচুপি আছে ? কিয় আবেগত উঠলি এতিয়া জুবিন গাৰ্গ অমৰ হওক বুলি চিঞৰি আছে ?
সন্ধিয়া তিনিআলিত চিগাৰেটৰ আদ্দা দিয়া নাইবা বিকট শব্দ কৰি বাইক চলোৱা ডেকা কেইটাই আজি কিয় চকু সেমেকা কৰি জুবিনদাৰ ফটোৰ আগত বন্তি জলাইছে ৷
জলি শেষহোৱা জুবিনদাৰ চিতাৰ কাষত কিহৰ বাবে হাজাৰ হাজাৰ লোকে বিনীদ্ৰ ৰাতি পাৰ কৰিলে ?
কলৈ গ’ল হিন্দুবোৰ, মুছলমান বোৰ, শাসক বোৰ, বিৰোধী বোৰ ? সকলোৱেই একেলগে আবেগিক অসমীয়া হোৱাৰ পৰিচয় দিলে ।
আমি অসমীয়াবোৰ কিয় ইমান আবেগিক বাৰু ?
আচলতে কাৰোবাৰ প্ৰতি কিমান মৰম আৰু আকুলতা থাকিলে মানুহ ইমান আবেগিক হ’ব পাৰে, প্ৰয়োজনত কাৰোবাক গালি পাৰিব পাৰে, প্ৰয়োজনত তেওঁৰ বাবেই চকুলো টুকিব পাৰে, জুবিন দাই তাকেই শিকাই থৈ গ’ল । প্ৰেম কি, মানৱ ধৰ্ম কি, টকাৰ ব্যৱহাৰ ক’ত কৰিব লাগে সেয়া জুবিনদাই শিকাই গ’ল ৷ মৰিও কেনেকৈ অমৰ হ’ব পাৰি সেয়া প্ৰমান কৰি গ’ল ৷ সকলোকে পুনৰবাৰ একত্ৰিত কৰি থৈ গ’ল। জুবিন দাৰ গান আৰু কণ্ঠই অসমীয়াৰ আবেগবোৰ আকৌ জাগ্ৰত কৰি গ’ল – কৌস্তুভ
কিন্তু এতিয়া এই আবেগৰ গতি সলনি কৰিবৰ হ’ল। যিয়ে আমাৰ মৰমৰ হাৰ্টথ্ৰ’ব জনক আমাৰ পৰা আঁতৰাই নিলে, এই আবেগৰ সুবিধা লৈ যিয়ে জুবিনদাক টকা ঘটাৰ উৎস হিচাপে ব্যৱহাৰ কৰিলে সিহঁতবোৰ যাতে কোনো ৰাজনৈতিক হস্তক্ষেপত কেতিয়াও সাৰি নাযায়, দোষীয়ে যেন উচিত শাস্তি পায় তাৰ বাবে এই আৱেগক প্ৰতিবাদলৈ ৰূপান্তৰ কৰিবৰ হ’ল ৷
জয় জুবিন দা
জুবিন দা অমৰ হওক ৷
#JusticeForZubeenGarg